ДагъистанСпортХарбал

Айзанат Муртазаевалъе кIиго шапакъат щвана Фехтованиялъул Дунялалъул Кубокалъул къецазда

Нилъер ракьцояй, Москваялда гIумру гьабун йигей Айзанат Муртазаевалъе кIиго шапакъат щвана гьал къоязда фехтованиялъул рахъалъ дунялалъул Кубокалъе гIоло Барселонаялда тIоритIарал къецазда.

Командаялъулал къецазда Айзанат мустахIикълъана гIарцул медалалъе, жийго цохIо цее яхъун тIоритIарал къецазда гьелъ босана мазгарул медаль.

Командаялъул къецазда Айзанатгун цадахъ цере рахъана Россиялъул спортсменкаби: Татьяна Андрюшина, Виолетта Колобова ва Анастасия Солдатова. Турниралъул киналго дандчIваязда Австриялдаса, Эстониялдаса, Великобританиялдаса ва Германиялдаса командабазда тIад бергьенлъиги босун, финалалда Франциялдаса бергьине кIвечIо гьезда. ДандчIвай лъугIана 34:45 хIисабгун.

Жийго цее яхъунел къецазда Бразилиялдаса цо ва СШАялдаса лъабго спортсменкаялдасаги бергьун, бащдаб финалалда гьей къуна Кореялдаса Сон Серахъа. Ахиралда гьей яхъана чемпионкалъунги.

Дунялалъул къецазда щвараб саламатаб кIиго шапакъатгун гьал къоязда Москваялде нахъ юссарай Айзанатилгун гьитIинабго гара-чIвари гьабизе рес рекъана нижерги.

Айзанат, баркула дуда дунялалъул Кубокалда щвараб кIиго медаль. Хадур гIемерлъаги. КIиго батIиял къецазда цее яхъун йиго мун Барселонаялда. Гьезул кинаб захIматаб букIунеб, мунго йигеб мехалъищ ялъуни командагун цадахъищ?

Баркала, хIакъикъаталдаги гьитIинаб даражаялъул турнир гуро гьеб букIараб. ГIемерал спортсменал гIахьаллъула гьенир. Дие, битIараб бицани, дунго цее яхъун тIоритIулел дандчIваязда бигьаго букIуна «шпагагун ягъизе». Щайин абуни, командаялъулал къецазда мун цее яхъиндал, кIиго бутIаялъ цIикIкIун захIмат букIуна гьениб – моралияб ва физическияб рахъалъ кутакаб тIадецуй букIуна, гьединлъидал гьений цIакъ кIвар кьун, кутакалда цIодорго «ягъизе» ккола шпагаялъ.

Токиоялъул Олимпиадаялдаса хадур, Халкъазда гьоркьосеб даражаялъул тIоцересел къецал гурищ гьел рукIарал?

У, Токиоялдаса хадуб араб бащдаб лъагIалида жаний дун кийниги цее яхъинчIо, гьединлъидал цIакъ тIадчIун хIадурлъулейги йикIана. Барселонаялде иналде нижер сборал рукIана Москваялда. ХIухьбахъи гьабизе заманцин букIинчIо. ЦIакъ кутакалда хIадурлъулел рукIана ниж гьенир. Барселонаялда киналго дандчIваял цоялдаса цоял захIматал рукIана ва, битIараб бицани, цIакъ свакана дун къецазул ахиралде. Амма моралияб рахъ босани, дун гьезде хIадурун йикIана ва дирго дидаго ракIчIейги букIана.

Командаялъул къецазда лъабго-ункъо пачалихъалъул командабаздасаги бергьун, Франциялъул командагун икъбал ккечIо нужее. Фехтованиялъул рахъалъ гьединал къуватал спортсменалищ гьезул ругел?

Дунялалъул кубокалда цониги загIипав спортсмен вукIунаро, гьенир киналго рукIуна къуватал ва церетIурал. Амма гьелъул рахъалъ Франциялъулги кидаго цIакъ церетIурал спорстменал рукIана. Риидалил Олимпиадаялъул къецаздаги гьезул команда финалиял ва бащдаб финалиял къецазде борчIула гIемерисеб заманалда.

Кинаб батIалъи бугеб мунго цее яхъунеб ва командагун цадахъ тIоритIулел къецазда гьоркьоб?

Командаялъул къецазда дур рес буго гIицIго щуго нухалъ шпага хIунсизе, ва дандчIваялъе кьураб заманги букIуна щуго минут. Мунго цее яхъунеб мехалъ 9 минут кьола ва 15 нухалъ хIунсизе ихтиярги букIуна. Гьединлъидал, цIакъго гIурхъаби къарал рукIиналъ, гьениб дагьаб захIматго букIуна ва къокъаб заманалда, тIолабго къуватги бакIарун, дандиясда тIад бергьенлъи босизе хIаракат бахъизе ккола.

Дида рагIун букIана фехтование рикIкIунин интеллектуалияб спортивияб тайпалъунилан…

БитIарабха гьеб. Фехтование ккола шахматалго гIадаб жо. Дандияв гуккизе кIвелародайилан, сагIат гIадин хIалтIулеб букIине ккола бетIер. ЛахIзаталда жаниб къотIизе ккола хIукму ва, шпага хIунсулелъул, дур кверзул хехлъи, кьвагьараб гуллил хехлъиялда бащалъулин аби буго фехтованиялда. Гьединаб спортивияб тайпа буго фехтование.

Жакъа Россиялъул спортсменазда гьоркьой, мугIрузул Дагъистаналъул вакил цохIо мун гурони йигищ?

Дун ругьун гьаюлеб залалде хьвадулей жеги кIиго яс йиго, амма гьел жеги гIисинал чагIи ккола. Халкъазда гьоркьосел къецазда цере яхъуней ясазул Дагъистаналдаса цохIо дун гурони гьечIо.

ГIагараз кин къабул гьабулеб дур спорт, дудаса рохун, чIухIун рукIунищ?

Валлагь рукIуна. Кидаго, сундулъго диде мугъчIвай гьабула. Дун къецазде унелъул цIакъ ургъалидаги рукIуна. Барселонаялдаса дун нахъюссиндалги лъикIаб дандчIвай гьабуна рокъоб.

Гьанже, 2024 соналда, Парижалъул Олимпиадаялда бергьенлъи босичIого чIеларо мун…

Узухъда, чIеларо (елъулаго). Щивав спортсменасулго гIадин, гьеблъидал дирги бищун кIудияб анищ, дир мурадазул тIогь. Олимпиадаялде тIадчIун хIадурлъизе ккола дун, Аллагьас хъван батани.

ГьабсагIат Пекиналда унел хасалил Олимпиадаялъул хIаязда хадуб халкколищ?

Кквезе ккеларищха, хасго нилъер фигуристал-ясазул буго бищун ургъел. Камилла Валиевалъе гьарулел ругел квекIаназул, добе Барселонаялдеги щвараб хабаралъ диргоги ракI лъукъана. Амма, ИншаАллагь, цогидазе квешезе бергьине йигейха гьей.

ВатIаналде ракIщоларищ? Кида ячIиней Дагъистаналде щвезе?

Риидал ячIине ният буго, Аллагьас хъван батани. ЦIакъ рокьула нилъер тIабигIат, мугIрул, иццал. Цо эркенго тира-сверизе ячIине ракIалда буго, щвелеб батила гьединаб рес.

Автор: Ашахан ЮСУПОВ

Кнопка «Наверх»